Балаларның рухи яктан бай, физик яктан сау- сәламәт булып үсүендә уеннарның роле бик зур.
Мәктәпкәчә яшьтәге балалар 20- 30 минут буе шөгыльләрдә утырып бик тиз арыйлар. Хәрәкәтсез утыру аларны ялыктыра, игътибарлары кими. Яшь организм әледән- әле хәрәкәт таләп итә. Шөгыльләрнең уен формасында алып барылуына өстәп, физик һәм музыкаль тәнәфесләр ясау эшнең нәтиҗәлелеген күтәрүгә ярдәм итә. Кул, бармак, гәүдә хәрәкәтләрен эченә алган гимнастик күнегүләр уен хәлендә күңелле узсын өчен, алар төрле санамышлар, җыр, такмаклар белән башкарылалар.
Уен сүзләре исә үз чиратында балаларны ритм, рифманы аңларга гадәтләндерә һәм алардагы сөйләм кимчелекләрен бетерергә ярдәм итә.